Vatan universiteti Ta’lim sifatini ta’minlash bo‘limi boshlig‘i O. Djurayev hamda Kommunikatsiya va axborot texnologiyalari kafedrasi mudiri B. Akmuradov 2026-yil 15–22-iyun kunlari Ispaniyaning Madrid shahrida Yevropa Ittifoqining Erasmus+ loyihasi doirasida tashkil etilgan xalqaro seminar-trening va uchrashuvlarda faol ishtirok etdi. Mazkur nufuzli tadbirda Ispaniya, Belgiya, Italiya, Ruminiya, O‘zbekiston, Qozog‘iston va Qirg‘izistonning yetakchi oliy ta’lim muassasalari hamda ilmiy markazlari vakillari qatnashib, kiberxavfsizlik sohasida ta’lim sifatini oshirish, zamonaviy magistratura dasturlarini takomillashtirish, IoT va bulutli texnologiyalar xavfsizligini ta’minlash, CyberLab laboratoriyalarini tashkil etish hamda xalqaro hamkorlik istiqbollari yuzasidan o‘zaro tajriba almashdilar.
Seminar-treninglar davomida ochiq kodli texnologiyalar asosida zamonaviy laboratoriya muhitlarini yaratish, kiberhujumlarni aniqlash va ularga qarshi samarali kurashish usullari, ta’lim dasturlarini xalqaro talablar asosida takomillashtirish hamda Markaziy Osiyo universitetlari uchun innovatsion o‘quv modellarini ishlab chiqish masalalari keng muhokama qilindi. Shuningdek, ishtirokchilar tomonidan kiberxavfsizlik sohasidagi ilg‘or tajribalar, ilmiy izlanishlar va amaliy yondashuvlar yuzasidan fikr almashilib, kelgusidagi qo‘shma loyihalar va akademik hamkorlik yo‘nalishlari belgilab olindi.
Mazkur xizmat safari Vatan universitetida kiberxavfsizlik yo‘nalishidagi ta’lim sifatini yanada yuksaltirish, xalqaro standartlarga mos zamonaviy laboratoriyalarni rivojlantirish, professor-o‘qituvchilar va talabalar uchun yangi imkoniyatlar yaratish hamda xorijiy hamkorlar bilan ilmiy-akademik aloqalarni mustahkamlash yo‘lida muhim qadam bo‘ldi.
Vatan universiteti xalqaro hamkorlikni kengaytirish, innovatsion ta’lim texnologiyalarini joriy etish va raqobatbardosh mutaxassislar tayyorlash borasidagi faoliyatini izchil davom ettiradi.
