MUHAMMAD YUSUF TAVALLUDIGA 72 YIL TO'LDI

          Universitetimizda o‘zbek she’riyatining yorqin namoyandasi, xalqimizning sevimli shoiri Muhammad Yusuf tavalludiga bag‘ishlangan ma’naviy-ma’rifiy davra suhbati tashkil etildi. Tadbir davomida shoirning sermazmun hayot yo‘li, boy ijodiy merosi hamda uning o‘zbek adabiyoti rivojiga qo‘shgan beqiyos hissasi haqida atroflicha fikr almashildi. Ishtirokchilar Muhammad Yusuf ijodining xalqchil ruhda ekanligi, Vatanga muhabbat, ona yurtga sadoqat, milliy qadriyatlarga hurmat va insoniy fazilatlarni tarannum etuvchi she’rlari bugungi yoshlar tarbiyasida muhim o‘rin tutishini alohida ta’kidladilar. Davra suhbati davomida talabalar tomonidan shoirning mashhur she’rlari yoddan ifodali tarzda o‘qildi, ijod namunalaridan parchalar tinglandi hamda Muhammad Yusuf qalamiga mansub satrlar yuzasidan qizg‘in munozaralar olib borildi. Bu esa tadbirning yanada mazmunli va taassurotlarga boy o‘tishiga xizmat qildi. Mazkur uchrashuv yoshlar qalbida Vatanga muhabbat, milliy o‘zlikni anglash, ma’naviy qadriyatlarga sadoqat va adabiyotga bo‘lgan qiziqishni yanada mustahkamladi. Shu bilan birga, talabalarning badiiy tafakkurini rivojlantirish, kitobxonlik madaniyatini yuksaltirish hamda ma’naviy dunyosini boyitishda muhim ahamiyat kasb etdi. Universitetimizda yosh avlodning ma’naviy kamolotiga xizmat qiluvchi ana shunday ma’rifiy tadbirlarni muntazam tashkil etish ezgu an’anaga aylangan.